SOLEKKO TULLA.
SOLEKKO HOLKATA.

2020 kamraattiroikassa toethiin, ette Meänmaasta puuttuu laaukas alternatiivisen taitheen ja kylttyyrin fästivaali. Totesimma, ette “solekko tehä”.
Ja niin perustethiin Solekko Tehä Ry, joka sen ensimmäisenä toimintavuotena järjesti ensimmäiset 200 hengen Solekko Festit Könkhään kylhään. Ensimmäiset fästit myythiin lophuun ja matka alko.
 
Solekko Fest oon profiloitunu laaukhaan, pohjosen maaperästä kumpuavan indie-, folk-, ja elektromysiikin fästivaaliksi. Met tarjoama kans monitaitheellisia työpajoja ja elämyksellistä visuaalisuutta Meänmaan alkusyksyn vyössä.
 
Solekko Fest oon pandemii-ajan keskelä synnytetty fästivaali, joka oon suurela syämmellä rohki saanu taistela olemassaolosthaan. Ilman kasvukipuja ei ole tätä klaarattu, mutta apua oon osattu pyytää ja sitä on kans saatu.
Solekko Festin takana oon aina jyllänny pohjonen yhtheisöllisyys. Vuen 2023 aikana sen voima vahvistu entisesthään. Fästivaaliorganisašuuni oon kasvanu ja saanu taustatukijoiksi ison roikan opastajia.
Syksylä 2023 Solekko Tehä Ry muutti Muonihoon ja suunnitelmat jatkaa Solekko Festiä olit kovassa vauhissa. Ikävä kyllä met jou’uima kuitenki toukokuussa 2024 tekehmään rohki ison päätöksen: ette jättää järjestämättä vuen 2024 tapahtuman niin isona, ko met aattelimma. Apurahapäätökset olit kieltheiset, ja olis ollu aivan liian suuri riski luottaa pelkhään lipunmyynthiin.
Pahhiimmassa taphauksessa s’olis voinu johtaa siihen, ette eshiintymispalkkioita ja sovittuja maksuja ei olis saattanu maksaa, ja sitä met emmä olis haluhneet.
Solekko Tehä Ry freistaa kovasti tua pohjosen maaperästä kumpuava taije ja kylttyyri näkyväksi, rikkoa rajoja ja käsityksiä siittä, kua ja kelle kylttyyriä saapi tehä.
Siksi met emmä sunkhaan päättänheet jättää tekemättä kyltyyriä, ko fästivaali peruthiin. Yhistys kehittää koko ajan uusia mahollisuuksia tua pohjoselle aluheele sitä alternatiivistä, monipuolista, omanlaista, rajanylistä ja rajoja rikkovaa, yhtheisöllistä kylttyyriä, mitä Solekko Fest oon eustanu.
Met halvaama jatkaa työtä keikkojen, klybi-iltojen, taijenäyttelyitten ja kylttyyritoiminnan kans. Jos sie olet kiinnostunu tulehmaan fölhjyyn järjestämhään tämmöstä, niin meile saapii aina laittaa e-postia ja kertoa iteoista. Met tehemä mielelhään yhtheistyötä muitten kylttyyriyhistysten kans ja kehittelemmä isompia hankheita, mihin yhtheistyökumppanit oon rohki tervetulheita. Met halvaama kans pittää mielessä, ette meän yhistystoiminta oon liikkuvaista ja met voima keksiä tapahtumia muualekki ko Muonihoon, vaikkapa Ouhluun, Inahriin, Saariseläle eli vaikkapa Haaparanthaan eli Pajahlaan. Keksimä ja luoma kylttyyriä yhessä, SOLEKKO TEHÄ!
Solekko Tehä Ry eustaa yksinkertasen hyyää meininkiä. Met vaalima Meänmaan yniikkiä ja vahvaa elinvoimaa – niin taitheessa, yhtheisössä ko luonnossa. Jos sulla tekkee mieli tulla fölhjyyn eistämhään tätä - liity yhistyksen jäseneksi!
 
Tule fölhjyyn yhistyksen toiminthaan, niin olet automaattisesti följyssä, ko suunnittelema uutta. Kaikki meän tapahtumat oon ilmasia meän jäsenille, eikä tartte olla kaikessa välttämättä mukanakhaan hommaamassa. 
Yhistystä saattaa kans tukea kannatusjäsenenä. Kannatusjäsenenä pääset fööshiin yhistyksen vuosifästhiin syksylä 2024. Met tieotamma vuosifästistä myöhemmin.
 
Maksutiot 
Tilinumero:FI07 5640 0220 4888 32
Saaja: Solekko Tehä Ry
 
Kannatusjäsenyys: 10€
Uus yhistyksen jäsen: 60€ (liittymismaksu 30€+yhistyksen jäsenmaksu 30€)
Uusiutuva yhistyksen jäsenyys: 30€

Liittymisformylääri oon tässä.